Салвадор суди Mara Salvatrucha (MS-13) тўдасининг 248 нафар аъзоси устидан ҳукм чиқарди, деб хабар берди The Guardian. Улар жуда кўп жиноятлар, хусусан, 43 та қотиллик ва 42 та бедарак йўқолганлик ҳолати бўйича айбланаётган эди.

Жиноятчилардан бири 1335 йиллик қамоқ жазосини олди. Яна 10 киши 463 йилдан 958 йилгача қамоқ жазосига ҳукм қилинди. Ишлар якка тартибда кўриб чиқилганми ёки жамоавий тартибдами — хабарда аниқлик киритилмаган.

Президент Наиб Букеле 2022 йил март ойида мамлакатда фавқулодда ҳолат эълон қилиб, жиноий гуруҳларга қарши курашни кучайтирди, полицияга айбланувчиларни ордерсиз ҳибсга олишга рухсат берилди. Ўтган даврда 90 мингдан ортиқ киши ҳибсга олиниб, 8 мингга яқини айбсиз деб топилиб, озодликка чиқарилган.

Расмий манбаларга кўра, MS-13 ҳамда Barrio жиноий тўдалари сўнгги 30 йилдаги 200 000 мингта қотилликка алоқадор. Уларга қарши уруш очилгунига қадар, жиноий тўдалар мамлакат ҳудудининг тахминан 80 фоизини назорат қилган ва Салвадор қотилликлар даражаси энг юқори минтақалардан бўлган. Жиноий гуруҳлар зўравонлик билан тадбиркорлардан пул ундириб келган, оқибатда кўплар ишини ёпишга мажбур бўлган. Босқинчиликка қарши давлат миқёсида кураш бошлаганидан сўнг мамлакатда қотилликлар сони тарихий минимумгача камайди.

1335 йил — тарихдаги энг узоқ қамоқ жазоси эмас. Таиландлик аёл Чамой Типясо фирибгарлиги учун 2006 йилда 141078 йилга қамалиб, Гиннесснинг рекордлар китобига киритилган. Бироқ Таиланднинг 1980-йилларда қабул қилинган қонунларига кўра, аёл киши қамоқда 20 йилдан ортиқ ўтириши мумкин эмас эди. Типясо 8 йил қамоқда ўтирганидан сўнг, озодликка чиқарилган.