Оқ уй АҚШ президенти Дональд Трамп ташаббуси билан тузилган «Тинчлик кенгаши»нинг биринчи йиғилишини 19 февраль куни ўтказишни режалаштирмоқда. Бу ҳақда Axios нашри дипломатик манбалар ва америкалик амалдорларга таяниб хабар берди.

Нашрга кўра, йиғинни ўтказиш режалари ҳали дастлабки босқичда бўлиб, улар ўзгариши мумкин. Кутилишича, учрашув Вашингтонда, АҚШ Тинчлик институти биносида бўлиб ўтади. Ушбу муассаса 2025 йил декабрь ойида расман «Дональд Трамп номидаги Тинчлик институти» деб қайта номланган.

Трамп маъмурияти мазкур йиғилишдан Ғазо секторидаги ўт очишни тўхтатиш бўйича келишувнинг иккинчи босқичини амалга оширишни илгари суриш, шунингдек, ҳудудни тиклаш учун молиявий маблағлар йиғиш мақсадида фойдаланмоқчи.

«Тинчлик кенгаши» дастлаб айнан Трампнинг тинчлик режаси доирасида Ғазо сектори келажаги бўйича қарорлар қабул қилиш учун ташкил этилган. Кейинчалик эса АҚШ президенти ушбу органни дунё бўйлаб турли минтақавий можароларни ҳал этишда ҳам қўллаш нияти борлигини билдирган.

Кенгаш низомига мувофиқ, Дональд Трамп унинг алмаштириб бўлмайдиган раиси ҳисобланади ва фақат ихтиёрий равишда лавозимдан кетиши мумкин. Бошқа давлатлар раҳбарлари «Тинчлик кенгаши»га фақат АҚШ президенти таклифи асосида қабул қилинади.

Маълум қилинишича, Европа Иттифоқининг аксарият йирик ва таъсирли давлатлари ушбу ташаббусда иштирок этишдан бош тортган. Шу билан бирга, Трампнинг таклифини Исроил, Венгрия, Индонезия, Саудия Арабистони, Беларусь, Ўзбекистон, Қозоғистон ва қатор бошқа давлатлар қабул қилган.