Хитой энергетика соҳасида сўнгги тўрт йил ичида мисли кўрилмаган ўсишни намойиш этди, деб хабар берди Bloomberg. Мамлакатнинг ушбу даврдаги кўрсаткичлари АҚШнинг бутун энергия тизими қувватидан ошиб кетди.

Чин юрти келажак саноатининг стратегик тармоқларида етакчиликни қўлга киритиш учун энергия сарфи юқори корхоналарни таъминлашга қаратилган жадал қурилиш ишларини олиб боряпти. Миллий энергетика бошқармаси маълумотларига кўра, ўтган йилнинг ўзида ХХР барча технологиялар бўйича жами 543 гигаватт янги қувватларни ишга туширган. Бу кўрсаткич 2024 йил охиридаги Ҳиндистоннинг барча электр станциялари умумий қувватидан 12 фоизга кўпроқдир.

Эътиборли жиҳати, 2021 йил охиридан бери Хитой томонидан қўшилган янги энергетика қувватлари ҳажми АҚШ энергия тизимининг жами имкониятларидан юқоридир.

Си Цзинпин бошчилигидаги Хитойнинг асосий мақсади — барқарор ва мўл-кўл энергия таъминоти орқали ёқилғи импортига қарамликни камайтиришдир. Бундай стратегик захира сунъий интеллект, робототехника ва илғор материаллар ишлаб чиқариш каби энергия талаб қиладиган соҳаларга катта рақобатдош устунлик беради.

Айни пайтда Қўшма Штатларда арзон электр энергияси етишмовчилиги сабабли ушбу инновацион соҳалар ривожланиши чекланиб қолиши мумкинлиги борасида хавотирлар кучаймоқда.

Аввалроқ Хитойда ортиқча энергияни сақлаш учун сиқилган ҳаводан фойдаланувчи қурилма ишга тушгани ҳақида хабар берилганди.