АҚШ давлат департаменти БМТ Бош ассамблеяси тадбирларида қатнашиши белгиланган Фаластин вакилларининг визасини бекор қилди. Бу Фаластин президенти Маҳмуд Аббос ҳамда 80 га яқин фаластинлик расмийларнинг жорий йил сентябр ойида Ню-Йорк шаҳрида ўтадиган БМТ тадбирларида қатнашиш имконидан маҳрум этилганидан далолат беради.

Давлат котиби Марко Рубио Фаластин томонини «тинчлик йўлидаги уринишларни йўққа чиқариш» ва «назарий жиҳатдан мавжуд бўлган Фаластин давлатини бир томонлама тан олиш»га уринишда айблаган.

Давлат департаменти Фаластин расмийлари визаси бекор қилинишини «терроризмни рағбатлантирмаслик» мақсади билан ҳам асослаган.

Фаластин томони АҚШнинг ушбу қарорини 1947 йилда қабул қилинган БМТ штаб-квартираси ҳақидаги битимга зид дея қоралаган. 

Фаластин ташқи ишлар вазирининг маслаҳатчиси Аҳмад ал-Дик БМТ бош котиби Антониу Гутерриш ва аъзо давлатларни ушбу ҳолатга эътибор қаратишга чақирган.

Жаҳон матбуотининг ёзишича, АҚШ БМТ бош қароргоҳи жойлашган давлат сифатида халқаро ташкилот анжуманларида давлатларнинг тўсиқсиз қатнашишига имкон яратиши керак. Вашингтоннинг Фаластинга нисбатан қарори айни шу жиҳатга кўра танқид қилинмоқда.

БМТ Бош ассамблеясининг сентябр ойида ўтадиган йиғинида Франция, Буюк Британия, Канада ва Австралия Фаластин давлатини тан олиши кутилмоқда.

Бу жиҳатдан, АҚШ давлат департаментининг баҳсли қарори Фаластин давлатини тан олишга қарши ҳаракат ҳам деб баҳоланмоқда. 

Президент Доналд Трамп маъмурияти виза чекловига параллел равишда Ғазо секторидан ярадор болаларни қабул қилиш дастурини ҳам тўхтатган.

АҚШ 2023 йил 7 октябрдан буён Ғазо секторида давом этаётган ва ўн минглаб фаластинлик ўлимига сабаб бўлган урушда Исроилни ҳеч қандай шартларсиз моддий, ҳарбий ва дипломатик тарзда қўллаб-қувватлаб келмоқда.

Вашингтон Фаластин давлати тузилишига ҳам тиш-тирноғи билан қарши чиқмоқда. Ўтган йил 18 апрел куни БМТ Хавфсизлик кенгашида Фаластиннинг БМТга тўлақонли аъзолиги тўғрисида резолюция лойиҳасини ҳам  биргина АҚШ вето ҳуқуқидан фойдаланган ҳолда йўққа чиқарганди.

Қўшма Штатлар ўша йилнинг май ойида БМТ Бош ассамблеясининг навбатдаги ташқари йиғилишида Фаластиннинг халқаро ташкилотга тўлақонли аъзолиги кўзда тутилган резолюцияга ҳам қарши овоз берганди.