Uzbekistan Airways 22 та Boeing 787-9 Dreamliner самолётларини сотиб олиш учун кредит маблағларини жалб қилишни режалаштирмоқда. Бу ҳақда Spot нашри авиакомпания бошқаруви раиси Шуҳрат Худайқуловга таяниб хабар бермоқда. 

Шуҳрат Худайқулов авиакомпания учун Boeing 787 Dreamliner хариди учун эҳтиёж пайдо бўлганини, бу – парвозлар географияси, республика ичидаги ҳаракатчанлик ва умуман республиканинг дунё билан ўзаро муносабатларида кўринаётганини таъкидлаган.

Қайд этилишича, таъминот 2030 йил охирида бошланади ва 3−4 йил давом этади: дастлабки режага кўра, парк ҳар йили 4−5 та самолёт билан тўлдирилади.

Бундан ташқари, учувчи-мутахассисларни тайёрлаш учун бу йил ўқув-машғулот маркази базасида МДҲ мамлакатларида биринчи бўладиган Boeing 787 Dreamliner самолётининг тўлиқ тренажёрини ўрнатиш режалаштирилган.

«Флотни кўпайтириш доирасида ушбу самолётларни сотиб олиш учун кредит маблағлари жалб қилинади. Компания бугунги кунда тўлиқ тўловга қодир. Ўтган йил давомида компаниянинг соф фойдаси 1,3 трлн сўм ёки 100 млн доллардан ортиқ бўлиши кутилмоқда. Нима деб ўйлайсиз, бундай ўсишни кўрсатаётган компаниянинг бунга қурби етадими? Табиийки, мумкин», – деган Шуҳрат Худайқулов, бироқ 22 та Boeing самолётларини етказиб бериш бўйича шартнома нархига изоҳ бермаган.

Унинг сўзларига кўра, ҳисоб-китоблар амалга оширилган. Самолётларни сотиб олиш тўғрисидаги қарор кузатув кенгаши, Иқтисодиёт ва молия вазирлиги ва ҳукумат тимсолида ягона акциядорнинг позицияларини ҳисобга олган ҳолда қабул қилинган.

Авиакомпания раҳбари, шунингдек, ижтимоий тармоқларда Boeing 787 Dreamliner самолётлари гўёки Россия манфаатлари учун шартнома тузилганлиги муҳокама қилинаётганини таъкидлаб, бу «авиакомпания вакили ва республика фуқароси сифатида» уни хафа қилганини айтади.

«Авиакомпания вакили ва республика фуқароси сифатида буни эшитиш мен учун ёқимсиз», — дея қўшимча қилган у ва барча самолётлар Ўзбекистон манфаатлари йўлида парвоз қилишини таъкидлаган.

Эслатиб ўтамиз, 2025 йилнинг сентябр ойида АҚШ президенти Дональд Трамп ўзининг Truth Social ижтимоий тармоғидаги саҳифасида Президент Мирзиёевнинг АҚШга амалий ташрифи доирасида Boeing компанияси билан 22 та самолёт учун қиймати 8 млрд доллардан ортиқ бўлган шартнома тузганлиги ҳақида ёзган эди.