Уюшган жиноятчиликка қарши курашишдаги айрим сусткашликлар кескин танқид қилинди. Хусусан, чет элга чиқиб, у ерда уюшган жиноий гуруҳлар тузган, шу жумладан ўз фуқароларимизни ҳам талон-тарож қилаётган шахслар фаолиятига ўз вақтида чек қўйилмаётгани қайд этилди.

Таъкидланганидек, илгари асосан “кўча жиноятчилиги” сифатида намоён бўлган уюшган жиноятчилик бугунги кунда “бизнес ниқоби” остида даромадли соҳаларга кириб бормоқда. Айниқса, кўп қаватли уйлар ҳамда автомашиналар олди-сотдиси, молиявий пирамидалар ташкил этиш, шунингдек, “Ҳаж” ва “Умра” зиёратини уюштириш билан боғлиқ жиноятлар кўпайганига эътибор қаратилди.

Маълум қилинишича, шаҳарда хонадон сотиш билан боғлиқ фирибгарликлар натижасида 3 мингдан ортиқ фуқарога жами 1,3 триллион сўм миқдорида моддий зарар етказилган.

Шунингдек, масъул идоралар томонидан аҳолининг ҳуқуқий саводхонлигини ошириш, фуқароларни фирибгарлар қопқонидан ҳимоя қилиш борасидаги ишлар етарли даражада ташкил этилмаётгани ҳам танқид остига олинди.