Ўзбекистонлик 30 ёшли ҳужумчи Элдор Шомуродов FIFA’га интервью бериб, жаҳон саҳнасига чиқиш нафақат Ўзбекистон, балки бутун Марказий Осиё учун ҳам катта фахр эканини таъкидлади.

«Бу ҳис-туйғуларни сўз билан ифодалаш жуда қийин. Нафақат биз, балки бутун Ўзбекистон бу йўлланмани жуда истаган эди. Натижадан кейин ҳамма хурсанд бўлди, чунки бу халқимиз ва мухлисларимиз учун нимани англатишини яхши тушунардик. Шунинг учун бу биз учун жуда катта воқеа.

Нафақат Ўзбекистондан, балки бутун Марказий Осиёдан футбол мухлислари бизни табриклади. Агар янглишмасам, Қозоғистон президенти ҳам бир тадбирда бизнинг президентимизни табриклаган. Агар биз яхши ўйнаб, муносиб натижалар кўрсатсак, Ўзбекистон терма жамоасининг бутун дунё бўйлаб мухлислари пайдо бўлади», – деди у.

Жаҳон чемпионатида Ўзбекистон K гуруҳида Колумбия, Португалия ҳамда Конго ДР, Ямайка ёки Янги Каледониядан бири билан тўп тепади. Учрашувлар Мехико, Хьюстон ва Атланта шаҳарларида бўлиб ўтади. Терма жамоага жаҳон чемпиони Фабио Каннаваро мураббийлик қилади.

«Қуръа ташлашдан олдин ҳам ким билан тушишимиз у қадар муҳим эмаслигини билардим. Бизнинг вазифамиз — гуруҳдан чиқиш, қолгани тақдирга боғлиқ.

Албатта, қўлимиздан келганча ҳаракат қиламиз. Биз ўз мамлакатимизни намоён этяпмиз ва шу сабаб бутун дунёга Ўзбекистон кучли жамоалардан бири эканини кўрсатишга ҳаракат қиламиз. Аммо катта ваъдалар беролмаймиз.

Айримлар бизга аутсайдер сифатида қараши мумкин, лекин вазифамиз — бу тасаввурларни йўққа чиқариш», – деди у.

Шомуродов 22 ёшида «Ростов» орқали Европага йўл олган. Кейин «Женоа», 2021 йилда эса «Рома»га ўтди.

2022 йилда у «Рома» билан UEFA Conference League’ни ютиб, Европа клуб мусобақасида ғалаба қозонган илк ўзбек футболчисига айланди. Ҳозирда Туркиянинг «Башакшеҳир» клубида ижара асосида тўп сураётган Шомуродов жорий мавсумда 17 ўйинда 12 та гол ва 3 та голли узатма билан тўпурарлар рўйхатини бошлаб турибди.

Европада ўн йил давомида Криштиану Роналду, Хамес Родригес каби юлдузлар билан тўқнаш келган Шомуродов учун бу номлар энди қўрқитувчи эмас. У кўпроқ ўз мисолида ёш ўзбек футболчиларига йўл очишни муҳим деб билади.

«Мен Европага кетганимда биздан олдин у ерда ўйнаган футболчилар жуда кам эди. Энди эса биз қодир эканимизни исботладик. Ўзбекистондан чиққан футболчилар кучли Европа жамоаларида ўйнаётганини бутун дунё кўрди. Бу нафақат терма жамоага, балки умумий ўзбек футболига ҳам фойда келтиради.

Ўзбекистонда футболни доим яхши кўришган. Болалигимда жаҳон чемпионатига чиқолмаганимизда мухлислар қанчалик хафа бўлганини эслайман. Бугун эса сўнгги муваффақиятларимиз ва президент томонидан спортга, айниқса футболга берилган эътибор туфайли мухлисларнинг муносабати ўзгарди.

Футболчилар Европага йўл олди, инфратузилма ривожланди, ёшлар учун имкониятлар яратилди. Энди буларнинг самараси кўрина бошлади», – дейди Шомуродов.

Унинг айтишича, жаҳон чемпионатида АҚШда яшовчи ўзбеклар қўллаб-қувватлаши ҳам катта аҳамиятга эга бўлади.

«Энди жаҳон чемпионатига чиқишимиз аниқ бўлгани учун Ўзбекистондан ҳам кўплаб мухлислар боришни режалаштирмоқда. Улар олдида ўйнаш бизга катта куч беради. Америкада ҳам кўплаб ўзбеклар бор – уларнинг қўллаб-қувватлаши янги ғалабаларимизга ёрдам беради», – дейди Ўзбекистон терма жамоаси сардори.