Samarqand viloyati, Pastdarg‘om tumani Kichik Nayman MFYda yashovchi bir guruh fuqarolar nomidan tahririyatga murojaat kelib tushdi.

Murojaatda ta’kidlanishicha, mahalla aholisiga har 45 kunda yetkazib berilishi lozim bo‘lgan suyultirilgan gaz balonlari qariyb 90 kundan buyon to‘ldirilmagan.

“Gaz balonlarimiz har 45 kunda to‘ldirilishi kerak edi. Ammo mana, 90 kun bo‘ldiki, to‘ldirilmayapti. Mahallamizda yolg‘iz keksalar, nogironligi bo‘lgan shaxslar va yosh bolali oilalar ko‘p. Ayniqsa qishning qirovli, sovuq kunlarida bu holat ularga juda qiyin kechmoqda. Yomg‘ir ostida bolasiga kasha qaynatayotgan yosh kelinlarimiz bor”, — deyiladi murojaatda.

Fuqarolarning bildirishicha, mavjud holat ijtimoiy himoyaga muhtoj qatlam va bolali oilalar uchun ayniqsa og‘ir kechmoqda. Ular mazkur muammoga tezkorlik bilan e’tibor qaratilishi, gaz ta’minoti o‘z vaqtida va uzluksiz yo‘lga qo‘yilishi yuzasidan mutasaddi tashkilotlardan amaliy yordam kutayotganini ma’lum qilgan.

Masala yuzasidan mas’ul idoralardan tegishi chora va rasmiy izoh kutib qolamiz.