Исроил ҳаво-ҳарбий кучлари Wizz Air авиакомпаниясига тегишли йўловчи самолётини кузатиб бориш учун қирувчи самолётларни ҳавога учирди. Бунга самолёт бортидаги бола ўз телефонидаги Wi-Fi тармоғини “террорист” деб номлагани сабаб бўлган. Бу ҳақда Daily Mail хабар берди.

Wizz Air самолёти Лутон аэропортидан учиб, Бен-Гурион аэропортига йўл олган пайтда йўловчилардан бирининг телефонидан “таҳдидли сигнал” келган.

Кейинчалик маълум бўлишича, “таҳдидли хабар” бола томонидан яратилган Wi-Fi нуқтасининг номи бўлиб, у тармоқни “террорист” деб номлаган экан. Нотаниш ва хавотирли ном йўловчилар ҳамда экипаж орасида саросима уйғотиб, хавфсизлик чораларини ишга туширишга сабаб бўлган.

Ҳодиса ортидан Исроил ҳаво-ҳарбий кучлари бир нечта қирувчи самолётни ҳавога кўтариб, лайнерни Тель-Авивгача кузатиб борган. Қўнишдан олдин самолёт Ўрта Ер денгизи устида уч марта айланган.

Самолёт Бен-Гурион аэропортига қўнганидан сўнг йўловчилар ва уларнинг юклари портловчи моддаларни аниқлашга ихтисослашган кинологлар иштирокида синчковлик билан текширилган. Шу вақт ичида ҳукумат рейсларни қабул қилиш ва жўнатишни вақтинча тўхтатган.

Исроил аэропортлари бошқармаси вакили текширувлар натижасида ҳеч қандай таҳдид йўқлиги аниқланганини ва тез орада авиақатнов одатий режимига қайтганини маълум қилган.