АҚШ президенти Дональд Трамп Украинадаги урушни тугатишга қаратилган эҳтимолий тинчлик келишуви Россия эмас, балки Украина томонидан кечиктирилаётганини билдирди.

Трамп Reuters агентлигига Оқ уйда берган эксклюзив интервьюсида Россия президенти Владимир Путин урушни якунлашга тайёр эканини айтди. Унинг сўзларига кўра, Москва келишувга очиқ, аммо Киев бунга унчалик тайёр эмас.

«Менимча, у келишув тузишга тайёр, – деди Трамп Владимир Путин ҳақида. – Украина эса бу борада тайёр эмасдек туюляпти».

АҚШ воситачилигида олиб борилаётган музокаралар нега ҳозиргача Европа қитъасида Иккинчи жаҳон урушидан кейинги энг йирик ҳарбий можарони ҳал қилишга олиб келмагани ҳақидаги саволга Трамп бир сўз билан «Зеленский», дея жавоб берди.

Кейин у Украина президенти учун бундай қарорни қабул қилиш қийин кечаётганини қўшимча қилди.

Трампнинг бу баёнотлари Европа давлатлари позициясидан кескин фарқ қилади. Европа иттифоқчилари фикрича, Россия Украинадаги урушни тўхтатишдан манфаатдор эмас.